Русија и Иран треба да дадат поддршка во процесот на политичко надминување на кризата во Сирија, изјави денеска турскиот министер за надворешни работи Мевљуд Чавушоглу, цитиран од ТАСС.
Тој потсети дека се планира во Москва да се оддржи нов круг преговори за надминување на сириската криза.
Националната коалиција на сириските опозициски и револуционерни сили е полноправна членка на сирискиот народ. Од напорите за обезбедување политички преод во Сирија не треба да се исклучува ниту една земја, вклучително и Русија и Иран. Сите земји треба да ја дадат поддршката во овој процес, рече Чавушоглу на прес конференција во Анкара со министерот за надворешни работи на Казахстан, Ерлан Идризов.
Според шефот на турската дипломатија, „контактите на Русија со сириската опозиција претставуваат природен тек од развојот на настаните во оваа земја“.
Турција и Русија имаат разлики за прашањето за надминувањето на сириската криза. Анкара смета дека е неопходно од власта да се острани сирискиот претседател Башар ал Асад и дека надминувањето на проблемот е невозможно со учеството на Асад. Москва, пак, од своја страна го смета Асад за законски избран и легитимен лидер на земјата и неговото учество во преговорите го смета за можно, забележува ТАСС.