Британскиот горен Дом на лордовите гласаше за измена на планот на премиерката Тереза Меј според што таа ќе може да ги започне преговорите за Брегзит само ако вети заштита на правата на три милиони граѓани на Европската унија кои живеаат во Велика Британија.
Со 358 гласови „за“ и 256 „против“ Домот на лородовте гласаше за амандман на законот за ЕУ со кој од британската Влада се бара да објави предлог за тоа како ќе бидат заштитени правата на државјаните на ЕУ кои во моментов живеат во Велика Британија, во рок од три месеци од започнувањето на преговорите за излез од Унијата.
Оваа одлука не го доведува во знак прашање законот што дозволува активирање на членот 50 од Лисабонскиот договор, но ќе предизвика доцнење на усвојувањето на тој текст што овозможува започнување на процедурата за напуштање на ЕУ.
Британската Влада соопшти дека е разочарана од ваквиот исход на гласањето, но Меј нагласи дека останува со намерата да го започне Брегзит пред крајот на март, без оглед на одлуката на Горниот дом.