Британски пратеници побараа од Владата во Лондон да го забрани продавањето оружје за Саудиска Арабија, додека оваа земја војува во Јемен против тамошните шиитски бунтовници.
Комисијата за контрола во извозот на оружје на британскиот Парламент соопшти дека британското оружје Саудиска Арабија го користи за кршење на меѓународните закони за хуманитарни и човекови права.
Владата на премиерката Тереза Меј тврди дека добила уверување од властите во Ријад, за почитување на меѓународните норми, но пратениците од Комисијата велат дека станува збор за недоволни и слаби ветувања.
Британската Влада се повеќе се соочува со притисокот да реагира против Саудиска Арабија, која се обвинува за кршење на меѓународните норми, давајќи им поддршка на јеменската Влада која е протерана од Сана и на локалните сунити, во војната со шиитите.
Министерот за надворешни работи Борис Џонсон, меѓутоа, ја брани продажбата на оружје на Саудиска Арабија, иако тоа се користи против бунтовниците во Јемен.
Џонсон изјави дека продажбата на оружје за властите во Ријад ќе продолжи.
Саудиска Арбија ја предводи арапската, сунитска коалиција во војната против бунтовниците, настојувајќи да го скрши нивниот отпор и да обезбеди враќање на сунитската Влада во Сана.
Саудиски авиони секојдневно учествуваат во бомбардирањето на позициите на бунтовниците, но и на делови на северен Јемен, при што најчесто страдаат цивили.
Во Ријад тврдат дека зад бунтовниците стои Иран и обидот на Техеран да го рашири своето влијание во регионот.