Британската полиција уапси петмина мажи, меѓу кои и четворица ирански државјани, под сомнение дека планирале да извршат терористички акти, соопшти денес полициската прес-служба.
„Апсењата се извршени во Лондон, Свиндон и поширокото подрачје на Манчестер, а се поврзани со сомневања за можно планирање напад врз одреден објект. Мажите, на возраст меѓу 29 и 46 години, се уапсени под сомнение за подготовка на терористички акт и ќе бидат задржани во притвор“, се вели во соопштението на лондонската полиција, според дневниот весник „Гардијан“, додавајќи дека националноста на еден од уапсените сè уште се утврдува.
Полициската единица за антитерористичка акција контактирала со локацијата што наводно била цел на нападот, со цел да ги информира присутните за заканата и да им обезбеди соодветни совети и поддршка, но од оперативни причини точната локација не била објавена. Полицијата вели дека истрагата се развива брзо и дека тесно соработуваат со луѓето во засегнатото подрачје за да ги информираат.
„Истрагата е сè уште во рана фаза. Истражуваме различни начини за да ги утврдиме можните мотиви, како и дали постои дополнителен ризик за јавноста поврзан со овој случај. Разбираме дека јавноста е загрижена и ги повикуваме сите да останат внимателни и да не контактираат доколку видат или слушнат нешто што ги загрижува, соопшти полицијата.
Во соопштението се потврдува дека полицијата претресува неколку адреси во областите на Голем Манчестер, Лондон и Свиндон во врска со оваа истрага.