На неформалниот состанок на министрите за надворешни работи на ЕУ во Брисел, високиот претставник на ЕУ за надворешна политика, Жозеп Борел, предупреди на можноста за понатамошна ескалација на тензиите на Блискиот Исток по одмаздничките американски напади врз проиранските милиции во Ирак и Сирија.
„Блискиот Исток е котел што може да експлодира во секој момент. И не треба да ги заборавиме нападите на либанската граница, север и југ, нападите во Сирија, нападите во Ирак и оние во Црвеното Море“, рече Борел.
Во исто време, тој мислеше на американската одмазда за нападите на Хутите и членовите на другите милиции, кои се поддржани од Иран во регионот.
„Затоа одлучивме за поморска мисија и затоа ги повикуваме сите страни да се обидат да избегнат ескалација на конфликтот“, рече Борел на маргините на неформалниот состанок на министрите за надворешни работи на ЕУ во Брисел.
Тој алудираше на договорената воена операција, чија цел е да се гарантира пловидбата на трговските бродови во Црвеното Море и да се запрат нападите на Хутите врз бродовите од Јемен. Борел ги повика сите страни да се обидат да избегнат ескалација на конфликтот, неколку дена откако проиранските милиции ги нападнаа американските војници во Јордан.