Белорусија денеска објави дека спроведува инспекција на своите вооружени сили за да се обезбеди борбена готовност.
„Од 11 октомври, Државниот секретаријат на Советот за безбедност на Република Белорусија, во согласност со упатствата на претседателот, врши инспекција на вооружените сили на Белорусија“, соопшти Министерството за одбрана на земјата.
Министерот рече дека инспекцискиот надзор е „сеопфатен и ги опфаќа најважните прашања за проверка на подготвеноста за извршување на задачите според предвидениот рок“.
Белорускиот министер за одбрана најави претходно дека заедничкото распоредување сили со Русија долж границата меѓу Белорусија и Украина е одбранбена мерка за да се обезбеди „сигурност“.
„Задачите на Регионалната група на сили се исклучиво одбранбени. Сите активности кои во моментов се спроведуваат се насочени кон соодветен одговор на акциите во близина на нашите граници“, изјави министерот за одбрана, генерал-потполковник Виктор Хренин.