Во Белгија расте десничарскиот и антивладиниот екстремизам, особено кај многу млади луѓе, се заклучува во извештајот на белгиската државна безбедност до кој пристап имале весниците „Ле Соар“ и „Кнак“.
Во својот последен разузнавачки извештај за 2021 и 2022 година, цивилната домашна безбедност за првпат известува за „загрижувачката радикализација на се повеќе млади луѓе“ во однос на екстремната десница.
„Графичкиот стил и содржината, објавите со омраза и отворено насилство на различни платформи на социјалните медиуми, како што е Телеграм, имаат некои сличности со глорификацијата на насилството од страна на Исламската држава пред неколку години“, се вели во извештајот цитиран од медиумите.
Се додава дека „во некои случаи тоа биле малолетници кои проповедаат омраза и насилство преку екрани, со радикални нацистички и антисемитски ставови“. Во други случаи, токму младите се закануваа дека ќе прибегнат на насилство“.
Генералниот администратор Франциска Бостин во интервју за овие два весника прецизира дека тоа важи и за младите од 14-15 години.