Белата куќа е „многу оптимистична“ во врска со шансите за постигнување договор за прекин на војната во Украина, изјави нејзината портпаролка, додавајќи дека специјалниот американски пратеник Стив Виткоф е на пат кон Москва.
„Мислам дека администрацијата е многу оптимист“, изјави Каролин Ливит, додавајќи дека претседателот Доналд Трамп и неговиот тим „работеа многу напорно на ова прашање и искрено сакаат да видат како завршува оваа војна“.
„Тие имаа многу продуктивни разговори со Украинците во Флорида вчера, а сега специјалниот пратеник Виткоф е на пат кон Русија“, рече портпаролката.
Кремљ соопшти дека Виткоф, кој ја посети руската престолнина неколку пати оваа година, ќе се сретне со Владимир Путин во среда. Патувањето на пратеникот на Трамп доаѓа во време на интензивен притисок врз Киев да го прифати американскиот план за прекин на војната, објави агенцијата Франс Прес.
Украинскиот претседател Володимир Зеленски и неговиот француски колега Емануел Макрон разговараа со пратеникот на Трамп и украинскиот преговарач Рустем Умеров во Париз, по американско-украинските разговори во Флорида во неделата.
Двете страни ги опишаа разговорите како „продуктивни“, но американскиот државен секретар Марко Рубио предупреди дека „сè уште има работа што треба да се направи“.