Генералниот секретар на ОН, Бан Ки-мун и американскиот претседател Барак Обама синоќа на средба во седиштето на ОН на Ист Ривер во Њујорк, ја потенцираа важноста од изнаоѓање политичко решение на конфликтот во Сирија, јави ИТАР-ТАСС.
– Тие ја разгледаа состојбата во Сирија и се согласија дека е важно да продолжи учаството на ОН во дефинирањето на прашањето за сириското хемиско оружје, а исто така и дека е важно да се најде политичко решение, кое е неопходно со цел да се избегнат нови жртви, соопшти Прес-службата на Светската организација по средбата, што се оддржа на маргините на заседанието на Генералното собрание на ОН.
Бан и Обама ги разгледале и односите меѓу САД и Иран и ја потенцирале важноста од напредокот за нуклеарното прашање.
На средбата, исто така, станало збор и за меѓународните напори за поддршката на Конго, Мали и Сомалија, како и за прашања поврзани со правата на човекот и реформирањето на ОН.