Ситуацијата во австрискиот град Трајскирхен, во близина на Виена, каде што се наоѓа прифатниот центар за азиланти, е многу тешка, а властите новопристигнатите бегалци почнуваат да ги сместуваат во автобуси.
Во прифатниот центар од минатата недела е прекинат приемот на нови азиланти, откако нивниот број надмина 4.000, а објектот има само малку повеќе од 2.000 места за спиење. Моментно во близина на центарот се наоѓаат 11 автобуси, кои служат како „чекалница“ за новите бегалци.
Според весникот „Стандард“, азилантите мора во автобусите да го поминат времето до првото испитување и здравствениот преглед. Секојдневно во возилата се сместуваат повеќе десетици азиланти, меѓу кои има и семејства со деца. Голем број од нив спиеле пред автобусите под отворено небо или на подот во возилата.
Австриското Министерство за внатрешни работи соопшти дека властите се заинтересирани за што е можно побрз натамошен транспорт на бегалците.