После најавата на шефот на новата германска влада дека систематски ќе спроведува строга миграциска политика од првиот ден, што вклучува затворање на границите за нелегалните имигранти, австрискиот канцелар Кристијан Штокер предупреди на неопходноста од координација со австриските власти.
„Се надевам дека ќе најдеме решение за внатрешните граници на Европската Унија кое ќе биде во духот на партнерството и кое ќе се базира на постојните закони“, изјави новиот австриски канцелар Кристијан Штокер во интервју за весникот „Велт ам Зонтаг“.
Тој реагираше на најавите на идниот германски канцелар Фридрих Мерц и началникот на кабинетот Торстен Фрај дека мерките за спречување на нерегулиран влез во Германија ќе бидат спроведени „од првиот ден“ од доаѓањето на власт на новата христијанско-социјалдемократска влада, која треба да положи заклетва во вторник.
Штокер објави дека Австрија „нема да прифати назад никого“ кој ќе биде вратен од австриско-германската граница „надвор од постапката регулирана со закон“.
Новата германска влада објави дека ќе им забрани влез во Германија на сите оние кои доаѓаат да аплицираат за азил и кои претходно влегле во Европската Унија преку друга земја-членка. Воедно, беше нагласено дека подготовката на овие мерки се спроведува во договор со соседите Австрија, Полска и Франција.
Фридрих Мерц планира да ги посети Франција и Полска на својот прв ден како канцелар.
Штокер (Австриска народна партија ÖVP) генерално ја поздрави најавата на новата германска влада дека поинтензивно ќе се бори против нерегуларната миграција, но во исто време истакна дека е потребна уште подобра заштита на надворешните граници на ЕУ.
„Тоа мора да биде заедничка цел“, рече Стокер.