Американскиот претседател Доналд Трамп му рекол на украинскиот претседател Володимир Зеленски во Ватикан дека САД, а не Украина, ќе го признаат Крим како дел од Русија, објави „Аксиос“.
„Според неименуван извор, Зеленски за време на состанокот повторил дека не го признава Крим како руски, а Трамп јасно ставил до знаење дека не го бара тоа. Планот е САД, а не Украина, да го сторат тоа“, објави американскиот портал.
Зеленски, исто така, му рекол на американскиот лидер дека не се плаши да прави отстапки за да го заврши конфликтот, но дека за тоа ќе му бидат потребни прилично солидни безбедносни гаранции, објави „Аксиос“.
Зеленски ги искористи своите 15 минути со Трамп во Ватикан за да го повика да заземе поцврст став кон Путин и повторно да го приоритизира воспоставувањето прекин на огнот, изјавија за „Аксиос“ два извори запознаени со прашањето.
Покрај тоа, според еден од изворите, за време на разговорот, Трамп вршел притисок врз Зеленски што поскоро да потпише договор за ретки минерали меѓу САД и Украина.
„Беше одлична средба и Зеленски не сакаше да презема никакви ризици“, рече неименуван извор.
Разговорите во Ватикан на денот на погребот на папата Франциск се одржаа откако САД се заканија дека ќе се откажат од своите напори за посредување во мирот во Украина и откако Трамп го осуди Зеленски за неговите коментари дека Украина нема да ја признае руската контрола врз Крим.