Сите го знаат летниковецот на Силвио Берлускони на Сардинија, местото каде екс италијанскиот премиер ги одржуваше познатите забави со манекенките.
Летниковецот кој се простира на 60 хектари има подземни тунели и таен излез во случај на опасност за што сите досега нагаѓаа, но италијанскиот фотограф Антонело Запада на својот блог ги објави првите фотографии токму на тој таен дел од летниковецот.
Запада кој стана познат во 2009. година откако ги сликаше голите девојки во резиденцијата на Берлускони, тврди дека фотографиите ги добил од анонимен извор.
Тајната подземна мрежа која потсетува на онаа од филмовите за британскиот таен агент Џејмс Бонд, има и базен на чие дно се наоѓа мозаик со ликот на Посејдон. Има и тунели кои водат директно на морето.
Тајниот подземен дел од вилата за кој знаела само тајната служба наводно е изграден во 2004. година откако Берлускони добил 38. заканувачки пораки.
