Американскиот претседател Џозеф Бајден навести дека Вашингтон може да ги укине ограничувањата за употребата на американски ракети со долг дострел од страна на Украина против цели на руска територија.
Ако тоа се случи, тоа ќе ги исполни повеќемесечните барања на Украина за ублажување на ограничувањата за оружјето од САД, за кое украинските лидери велат дека ги забавува за да се одбранат од руската инвазија.
Украинскиот претседател Володимир Зеленски постојано го повикува Западот да им дозволи на неговите сили да користат западното оружје со долг дострел за да ја нападнат Русија.
Украинскиот претседател Володимир Зеленски изјави дека има „план за победа“ што ќе му го претстави на американскиот претседател Џозеф Бајден подоцна овој месец. Планот, вели тој, ќе ја принуди Русија дипломатски да ја заврши војната. Украинскиот лидер рече дека планот ќе работи на зајакнување на Киев и ќе има „психолошко“ влијание врз Москва, но не даде дополнителни детали.
Тој додаде дека планот ќе треба да им биде претставен на сојузниците на Украина пред вториот меѓународен мировен самит, кој сака да го одржи подоцна оваа година.
„Ако партнерите го поддржат планот, на Украина ќе и биде полесно да ја принуди Русија да ја прекине војната“, рече тој.
„За што е овој план? Тоа е сериозно зајакнување на Украина и, според мене, ќе има психолошко и политичко влијание врз одлуката на Русија да стави крај на оваа војна“, рече Зеленски.
Подготовката на тој план Зеленски веќе ја спомена на прес-конференција на крајот на август, без да навлегува во детали. Тогаш тој само рече дека упадот на Украина во руската област Курск на почетокот на август е дел од тој план, со надеж дека тоа ќе и даде на Украина посилна позиција за евентуални мировни преговори со Москва.
Републиканците се длабоко поделени околу Украина и изборниот успех на Доналд Трамп може радикално да ја промени американската надворешна политика. Соработниците на Трамп посочија дека ако тој победи, тие ќе ја искористат помошта за да го принудат Киев да направи територијални отстапки кон Русија за да ја прекине војната.
Зеленски ги повика Обединетото Кралство и САД да донесат „силни одлуки“, мислејќи на дозволата за употреба на оружје со долг дострел длабоко во Русија.
„Малку подоцна ќе разговарам со Блинкен и со британскиот министер за надворешни работи. Не ги знам сите детали од нашиот разговор. Ќе бидам отворен и искрен“, рече тој.
Кремљ реагираше на можноста САД денеска да дадат дозвола за далечинско таргетирање цели во Русија. Од таму најавија „соодветен одговор“ на Русија доколку САД и дозволат на Украина да удри длабоко во Русија со ракетните системи АТАКМС.
Портпаролот на Кремљ, Дмитриј Песков, изјави за новинарите дека се чини дека Вашингтон веќе и дозволил на Украина да користи оружје за напади длабоко на руска територија. Вјачеслав Володин, претседателот на Долниот дом на рускиот парламент, во средата рече дека Москва ќе ги смета САД и нивните сојузници за страна во војната доколку му дозволат на Киев да користи оружје со долг дострел.
Русија и Кина би можеле да ги „здружат своите потенцијали“ доколку се соочат со агресија, изјави портпаролката на руското Министерство за надворешни работи, Марија Захарова.
На неделниот брифинг со новинарите, Захарова беше прашана за можното распоредување на американски ракети во Јапонија. САД, наводно, изразиле интерес за распоредување на ракетниот систем со среден дострел Тајфун во Јапонија за време на заеднички воени вежби.
„Сакам да ве потсетам дека Москва и Пекинг на „двојното одвраќање“ на САД ќе одговорат со „двојна контрамерка“, рече Захарова.
„Јасно е дека и Русија и Кина ќе реагираат на појавата на дополнителни и многу значајни ракетни закани, а нивната реакција ќе биде далеку од политичка, што двете земји исто така постојано го потврдуваат. Нашите односи не се насочени против трети земји. Ова е одбранбена позиција, ова не е иницијатива за таргетирање други земји, но ако се води агресивна политика против нас, зошто да не ги споиме нашите потенцијали и да одговориме на адекватен начин“, рече Захарова.
Рускиот претседател Владимир Путин изјави дека Москва треба да размисли за ограничување на извозот на ураниум, титаниум и никел како знак на одмазда против Западот. Тој рече дека вакви ограничувања може да се воведат и за други стоки и посочи дека Русија е голем производител на природен гас, дијаманти и злато.
-Но не треба да правиме нешто што ќе биде и на наша штета, рече тој.