Турскиот фудбалски сојуз одлучи да го прекине првенството на неодредено време по физичкиот напад врз судијата на натпреварот Анкарагучу – Ризеспор.
Синоќа тој натпревар од 15. коло заврши со резултат 1-1, а на самиот крај од мечот дојде до нереди на самиот тревник. Прв на теренот истрча Фарук Коча, претседателот на локалниот клуб, следен од многу навивачи.
MKE Ankaragücü Başkanı Faruk Koca'nın, Ankaragücü – Rizespor maçının ardından hakem Halil Umut Meler'e yumruk attığı o an!pic.twitter.com/wUhAMiNjOr
— Panenka Sport (@PanenkaSport) December 11, 2023
Претседателот на Анкарагуц го удри судијата Халил Умут Мелер со тупаница по лицето, по што тој падна на тревникот, а потоа 37-годишниот судија доби уште неколку удари, најверојатно од навивачи.
Веднаш по тие настани Турскиот фудбалски сојуз свика вонреден состанок на кој одлучи да го прекине првенството на неодредено време, јавува француската агенција АФП. Исто така, Здружението на турски судии ги повика своите членови да го искористат своето право да се повлечат. Се огласи и турскиот претседател Реџеп Ердоган.
– Го осудувам нападот врз судијата на фудбалскиот натпревар и никогаш нема да дозволиме насилството да се меша во турскиот спорт – рече Ердоган.
Судијата кој беше нападнат моментално се наоѓа на лекување во болница, а во врска со овие инциденти се уапсени три лица, меѓу кои и претседателот на фудбалскиот клуб Анкарагучу, јавуваат турските медиуми.