Состојбата со којашто се соочуваат жителите на Дојран, но и пошироко на Р Македонија, а се однесува на загаденоста Дојранското езеро е резултат на неодговорност на власта на ВМРО-ДПМНЕ. Дојранското езеро е загадено поради неодговорност на општината и градоначалникот и нивната негрижа за здравјето на луѓето и за животната средина, рече Пеце Мирчевски, член на Извршен одбор на СДСМ.
Поради загадување на водата во езерото над дозволеното, од страна на Државниот санитарен и здравствен инспекторат издадена е забрана за капење и затворени се четири, односно половина од плажите.
Но, езерото нема преградни ѕидови, па загадувањето ќе се шири, заканувајќи се со целосно уништување на животинскиот и растителен свет.
Во водата во Дојранското Езеро се наоѓаат екстремно високи концентрации на отпадни материи, фосфорни и азотни соединенија кои што ги надминуваат досега забележените концентрации на овие материи во кој било воден екосистем во земјата- покажува извештајот на РЕЦ.
Ова, не е ништо друго туку резултат на директно испуштање на фекалните отпадни води во езерото, без претходен третман.
Оттука, се поставуваат неколку прашања:
Прво: Зошто и покрај постоењето на колекторски систем и пречистителна станица во Дојран, надлежните на чело со градоначалникот дозволија до овој степен да се загрози здравјето на граѓаните и да се загади животната средина?
Второ: Дали и кој врши контрола на водата која излегува од пречистителната станици?
Зошто, ако се добиени резултати дека истата не е доволно пречистена , никој навреме не алармирал и не се зафатил со решавање на проблемот?
Трето: Зошто на листата на приоритети на општината и градоначалникот не се наоѓа заштитата на животната средина и здравјето на луѓето?
Во екот на летната сезона, кога жителите на Дојран се понадеваа на прилив на туристи, излезе на виделина недомаќинското и неодговорно работење на оваа криминална власт.
Ова што сега му се случува на Дојран и на езерото се заканува неповратно да го избрише од туристичката мапа на Македонија, а со тоа да предизвика немерливи економски последици.
Затоа, апелираме да се преземат најитни мерки за санација и ревитализација на пречистителната станица и доизградба на канализационата мрежа.
Не може Владата да има пари за барок и споменици во Скопје, а да не најде пари и за пречистителната станица и фекална канализација во Дојран.
Впрочем, тие се и поголем приоритет.
Со здравјето на луѓето и за животната средина не се прават компромиси.
Го повикуваме градоначалникот на ВМРО-ДПМНЕ веднаш да поднесе оставка.
Институциите без одлагање да започнат со санирање на состојбата.