Семејството на муслиман кој беше линчуван од хиндуистичка толпа во индиската држава Утар Прадеш во 2015 година поради гласини за консумирање говедско месо, изјави дека ќе ја продолжат својата борба за правда.
Нивната реакција доаѓа откако властите неодамна започнаа постапка за повлекување на сите обвиненија против мажите обвинети за неговото убиство, пишува Би-Би-Си.
Мохамед Ахлак, тогаш 50-годишен, беше претепан до смрт откако се прошири гласина дека складирал и јадел говедско месо, што неговото семејство сè уште жестоко го негира.
Колењето крави е исклучително чувствително прашање во Индија, каде што Хиндусите, кои сочинуваат 80 проценти од населението, ја сметаат кравата за свето животно. Утар Прадеш е една од 20-те индиски држави со строги закони кои забрануваат колење крави и продажба и консумирање говедско месо.
Нападот, кој се случи во Дадри, само 49 километри од главниот град Делхи, беше првиот голем и медиумски покриен случај на насилство поврзано со крави во Индија и предизвика протести низ целата земја.
Адвокат на семејството Ахлак потврди за BBC Hindi дека 18 лица се обвинети за низа кривични дела, вклучувајќи убиство и немири, но сите се ослободени со кауција. Сега владата на државата Утар Прадеш, предводена од партијата Бхаратија Џаната (БЏП), побара од локалниот суд да ги отфрли сите обвиненија против нив.
Во барање поднесено минатиот месец, државниот обвинител тврди дека имало „недоследности“ во исказите на сведоците при идентификувањето на обвинетите и побара од судот да го затвори случајот. Се очекува судот да одлучи за ова барање на 12 декември.
Оваа вест го шокираше семејството Ахлак, кое објави дека законски ќе се спротивстави на барањето на владата.
„Никогаш не помисливме дека нашата борба од 10 години ќе заврши вака“, изјави неговиот помлад брат Џан Мохамад за BBC Hindi.
Семејството го напушти своето село кратко време по убиството и никогаш не се врати.
„Сега се плашиме уште повеќе за нашата безбедност“, додаде Мохамед.
„Нема ли ова да ги охрабри криминалците?“, рече тој и се присети на судбоносната ноќ на 28 септември 2015 година, кога толпа вооружена со палки, мечеви и пиштоли влегоа во нивниот дом додека Ахлак спиеше во куќата со својот 22-годишен син Даниш.
Толпата ги нападна откако од локален хиндуистички храм беше пријавено дека некој заклал и изел крава.
Тие пронашле месо во фрижидерот, за кое семејството тврди дека е овчо месо, и го зедоа тоа како доказ.
Ахлак почина на лице место, а неговиот син Даниш беше сериозно повреден.