Најдобриот светски тенисер, Новак Ѓоковиќ, одлучи да учествува на Олимписките игри во Токио, каде ќе се бори за единственото злато од големите тениски натпреварувања кое го нема во колекцијата.
Веста со која ги израдува милионите фанови ширум светот, Ѓоковиќ ја соопшти на својот профил на Твитер.
„Со голема гордост се пакувам за Токио и ѝ се придружувам на нашата репрезентација во борбата за најсјајните одличја на олимписките борилишта. За мене, играњето за Србија секогаш била посебна радост и мотивација и ќе дадам сѐ од себе да нѐ израдувам сите“, напиша Ѓоковиќ.
По ова, Ѓоковиќ објави и видео на кое се гледа роденденската честитка за негов млад фан од Јапонија по име Куџиру, кој за својот шести роденден доби ветување од светскиот рекет број еден дека ќе се видат за време на Олимпијадата, која ќе се одржи од 23 јули до 8 август.
Cannot disappoint my little friend Koujirou. I booked my flight for Tokyo and will proudly be joining #TeamSerbia for the Olympics. ?? pic.twitter.com/23TmSdvc4x
— Novak Djokovic (@DjokerNole) July 15, 2021
Српскиот тенисер, по победата на Вимблдон, со која се израмни според бројот на грен-слем трофеи со најголемите ривали Роџер Федерер и Рафаел Надал, изјави дека сѐ уште размислува дали да настапи на Игрите во Токио, кои според најавите ќе се одржат без публика во салите и на стадионите, поради сериозната епидемиолошка состојба во Јапонија.