Првиот осминафинален натпревар од Купот на Македонија меѓу Вардар и Шкупи ќе се одигра утре на стадионот „Ѓорче Петров“. Овој дуел нема да се игра на Националната Арена „Филип Втори“ со цел да се сочува теренот на Арената за натпреварот од Лига Европа што Вардар ќе го игра со Розенборг на 7. декември.
Почетокот на утрешниот натпревар меѓу Вардар и Шкупи е во 13 часот, додека реванш дуелот овие две екипи ќе го одигра на 17. декември на стадионот „Чаир“.
Победникот од овој двомеч во четвртфиналето на Купот на Македонија напролет ќе игра со ланскиот финалист Шкендија. По денешните реванш четвртфинални дуели пласман во полуфиналето обезбедија: Академија Пандев, Ренова и бранителот на трофејот Пелистер.