Македонскиот фудбалски шампион Вардар денеска слави 66 години постоење, а утревечер против Стеауа ќе го одигра реваншот од 2.коло во квалификациите за Лигата на шампионите и ќе се обиде да го поправи впечатокот од првиот дуел во Букурешт кога романскиот претставник славеше со 3:0.
За дуелот со романскиот претставник многу подобро издание на своите избраници очекува тренерот Боби Милевски.
– Имавме лош ден на првата средба и не верувам дека уште еднаш може да ни се повтори играта од Букурешт. Бараме поддршка од трибините, а нашите играчи ќе го дадат максимумот. Ние се надеваме на подобар резултат, но сепак Стеауа е силен тим, ги казнуваат нашите грешки, а до нивниот гол тешко се стигнува. Важно е сите наши фудбалери што ќе истрчаат на теренот да се ангажираат максимално и да покажат дека и ние знаеме да играме фудбал, изјави Милевски на денешната прес-конференција.
Капитенот Раденко Бојовиќ со свое видување за реванш натпреварот.
– Сите знаат што значи Стеауа. Ние не успеавме да постигнеме добар резултат, загубивме со 3:0. Но, тоа головите во Букурешт беа по нашите грешки. Но, ќе напоменам додека има шанса да се бориме ние ќе го правиме тоа со цел да го направиме и невозможното. Се надевам дека публиката која ќе биде присутна на трибините ќе знае да не награди за нашата борбеност, независно од резултатот.
Натпреварот Вардар – Стеауа ќе се одигра утревечер од 20 часот и 45 минути на „Национална Арена Филип Втори“ во Скопје.