Суспензија од еден натпревар на домашен терен без присуство на публика и парична казна во износ од 25.000 евра изрече денеска Европската фудбалска асоцијација (УЕФА) за српскиот шампион Црвена ѕвезда поради инцидентот за време на натпреварот против Милан во рамки на Лига Европа.
Казната доаѓа поради навредите што му беа упатени на напаѓачот на Милан Златан Ибрахимовиќ во врска со неговото босанско потекло од ложата на стадионот „Рајко Митиќ“ во Белград на 18 февруари. Првиот шеснаесетфинален натпревар во Лига Европа, кој заврши без победник 2:2, се играше без публика, но на стадионот сепак биле присутни неколку стотици лица, велат од УЕФА.
Црвена ѕвезда ќе мора следниот европски натпревар на домашен терен да го игра со слоганот „Не на расизмот (“#NoToRacism“) со логото на УЕФА, а доколку српскиот шампион повтори сличен инцидент во период од една година ќе мора да одигра уште еден натпревар без присуство на публика.