Македонскиот фудбалски репрезентативец Стефан Спировски ги искажа своите очекувања во пресрет на квалификацискиот натпревар против Израел закажан за 5 септември во Хаифа.
– Сите ќе бидеме подготвени, а се надевам дека ќе имаме и малку повеќе среќа. Атмосферата во тимот е одлична, ако ја пренесеме формата и ефикасноста од настапите на клупски план, мислам дека ќе биде позитивно за нас во Израел. Наша задача во овие неколку денови е да го дадеме најдоброто од себе на тренинзите и да ги исполниме задачите кои ги бара од нас селекторот. За 90-те минути во Израел убеден сум дека секој што ќе добие шанса ќе даде максимум. Мислите ни се насочени единствено кон пресметката на 5-ти септември, чекор по чекор, подоцна за Албанија, изјави за сајтот на ФФМ новиот фудбалер на унгарски Ференцварош, Спировски.
Слично размислува и Езџан Алиоски кој викендот постигна погодок во дресот на англиски Лидс.
– Јасно е дека не очекува тежок натпревар, но ние одиме на три бода. Во овој македонски тим има квалитет, младите фудбалери носат нова енергија и се надевам дека конечно и резултатски ќе поминеме добро. Сакам да постигнам гол, но на крајот тоа е помалку важно, најбитно е да победиме, сеедно кој ќе биде ефикасен, вели Алиоски.