Селекторот на италијанската фудбалска репрезентација Џезаре Прандели поднесе оставка на функцијата откако неговите избраници не успеаја да ја поминат групната фаза на Светското првенство.
Прандели оставката ја соопшти на прес-конференцијата по поразот од Уругвај вчеравечер во Натал.
– Направив план за подготовките и настапот на Мундијалот, но тој не функционираше. Не знам зошто се случија некои промени откако го продолжив договорот. Не е како што беше претходно. Поради тоа јас ја преземам целата одговорност за неуспехот во Бразил и поднесувам неотповиклива оставка, изјави Прандели.
Тој беше предводник на Италија четири години, а актуелниот договор му истекуваше во 2016 година.
Примерот на Прандели го следеше и претседателот на Италијанскиот фудбалски сојуз, Џанкарло Абете кој исто така одлучи да ја напушти функцијата.