На фејсбук страницата на навивачката група „Шверцери“ од Скопје објавено е тврдење дека инцидентот на вчерашниот натпревар меѓу Албанија и Србија е предизвикан од неколкумина нивни членови.
Тврдењето од фејсбук страницата е преземено и од неколку регионални медиуми, па така хрватската новинска агенција Хина пренесува дека токму Албанци од Македонија се организаторите на инцидентот кога беспилотно летало со мапа на Голема Албанија и ликовите на албанските национални водачи Исмаил Ќемали и Иса Болетина се појави над теренот на стадионот Партизан.
Појавувањето на мапата предизвика тепачка меѓу фудбалерите на Србија и Албанија, а потоа и навлегување на навивачи на стадионот, по што албанските репрезентативци го напуштија теренот.
Српските медиуми за инцидентот го обвинија Олси Рама, братот на премиерот на Албанија Еди Рама, кој беше еден од ретките Албанци кои го следеа натпреварот, од ВИП ложата на стадионот во Белград.
Натпреварот беше затворен за навивачи од Албанија.
