Нова платформа за параглајдерство, проект на УСАИД и општина Прилеп за експанзија на малите бизниси беше промовирана денеска кај Трескавец. Воедно се одржа првиот куп „Прилеп опен 2914“ со 83 учесници од Албанија, Косово, Бугарија и од Македонија.
На манифестацијата присуствуваа и ја отворија американскиот амбасадор Пол Волерс и градоначалникот на Прилеп, Марјан Ристески.
Според амбасадорот Волерс, кој рече дека ќе лета во тандем со параглајдер за да го види Прилеп од „птичја“ перспектива, што според него, е добро за активниот туризам не само во Прилеп, туку и во Македонија.
– Многу сум среќен што сум тука и среќен што ќе го видам Прилеп од птичја перспектива. Многу е добро ова што се работи преку проектот за експанзија на малите бизниси и го развива активниот туризам, како и капацитетот на Македонија. Тоа што е добро за Прилеп, е добро за Македонија, изјави Волерс.
Според прилепскиот градоначалник Марјан Ристески, во иднина од овој терен ќе може да се одржуваат европски и светски купови во параглајдерство.
– Платформата ги задоволува европските и светските стандарди. Прилеп се етаблира во центар на екстремните спортови со мотоциклизмот и со болдерингот. Со овој натпревар ја затвораме сезоната на првенствата во екстремните спортови, изјави Ристески.
Организатори на натпреварот се клубовите „Скајрајдерс“ и „Делта“. Претставникот на клубовите, Златко Спиркоски нагласи дека е задоволен од одѕивот на параглајдеристите – учесници.
– Бројката е навистина за почит. Имаме 83 натпреварувачи во дводневниот куп како за европски и светски куп. Со ова прилепските параглајдеристи добиваат полетиште до градот и може да тренираат за да постигнат повисоки резултати во иднина, рече Спиркоски.
Во иднина сите туристи кои доаѓаат ќе може да закажат атрактивна тура и да летаат со параглајдер.