Операцијата на десниот глужд на носителот на 17 Гренд слем титули, Рафаел Надал, поминала успешно, соопшти самиот тој на социјалните мрежи.
„Матадорот“ поради хируршкиот зафат откажа учество во финалниот „Мастерс“ турнир на АТП и не можеше да се бори против Новак Ѓоковиќ за првото место на светската ранг-листа на крајот од 2018 година.
– Ви благодарам за пораките што ги добив вчера и денеска. Операцијата на глуждот помина добро и сакам да ви кажам дека го откажуваме егзибицискиот настан за поддршка на жртвите во Мајорка, напиша Надал на Твитер.
Откако Шпанецот го пропушта последниот АТП турнир за годинава, на негово место во Лондон се најде Џон Иснер, а другата резерва – Кеј Нишикори – доби право на учество заради откажување на Хуан Мартин дел Потро.