Вкупно 35 пливачи од сите градови на Македонија ќе учествуваат на Илинденскиот пливачки маратон што традиционално по 34-ти пат денеска ќе се плива на Охридското Езеро.
Пливачите поделени по две старосни категории и тоа до 16 и од 16 до 35 години ќе ја пливаат 2,5 километарската патека од кај поранешниот хотел „Парк“ до Градското пристаниште во Охрид.
Стартот на маратонот е предвиден за 10 односно 10.15 часот, а пристигнувањето на првите пливачи на целта е некаде половина час подоцна. Иако манифестацијата е од отворен карактер и очекувањата на организаторите беа дека настанот ќе побуди интерес барем кај клубовите од соседството, оваа година изостанаа натпреварувачи од странство. Единствен кој има потекло од Македонија, а доаѓа од Холандија, е Димитар Камнаровски. Охрид на „малиот маратон“ ќе биде претставуван од двајца пливачи и тоа Ангела Тасеска и Јован Наумоски од клубот „Охридски бранови“.
Минатата година на Илинденскиот пливачки маратон најуспешни беа нашиот Андреј Стојаноски и русинката Александра Умурзакова.