Кошаркарите на МЗТ Скопје во третиот меч дојдоа до првата победа во контролните средби пред новата сезона, откако денеска, во Истанбул, го совладаа турскиот второлигаш Бакиркој баскет со 92:72.
Македонскиот шампион и покрај убедливата победа не е задоволен од начинот на кој судиската тројка ја делеше правдата на овој меч.
Дамјан Стојановски беше убедливо најдобар во МЗТ Скопје Аеродром со 23 постигнати поени, а добра офанзивна партија прикажа и Даниел Џенсен со 20 поени. Брет Бејли застана на 12 поени, а Адем Мекиќ и Бојан Трајковски реализираа десет односно осум поени.
На првите две средби на турнејата во Турција, македонскиот првак загуби. Прво од Бујукчекмече, а потоа и од Цибона.
Сино-белите веднаш по мечот се враќаат во Македонија, каде што во понеделник накусо ќе продолжат со тренинзи пред заминувањето на нова мини-турнеја, овој пат во Бугарија и Романија каде што ќе ги одмерат силите со Левски, Лукоил Академик и двапати со Крајова.