Селекторот на македонската фудбалска репрезентација до 21 година Благоја Милевски, денеска ќе ја одработи суспензијата од еден натпревар, добиена на натпреварот со Русија.
Тој нема да ги предводи „црвено-жолтите“ на натпреварот со Австрија на гости попладне од 18 часот.
– Репрезентацијата за мене секогаш ќе биде над се. Додека сум на оваа позиција секогаш ќе ги бранам интересите на нашата селекција и никогаш нема да дозволам некој да се подигрува со угледот на тимот и федерацијата која ја претставувам. Уште повеќе по нечиј одлуки кои го газат трудот на фудбалерите и прават да се чувствуваме дека сме со пониска вредност во однос на противникот, изјави Милевски за веб страницата на ФФМ.
Македонскиот селектор смета дека е казнет неправедно.
– Правилата се јасни, имаме право на замена во судиското надополнување, но не ни дозволија иако имаше две можности тоа да го направиме. Се надевам дека ќе бидеме исто толку мотивирани и борбени како против Русија. Ако одиграме на тој начин, нема причина за грижа, сеедно каков ќе биде исходот. За нас фудбалот треба да биде на прво место и на тој начин и се однесуваме, вели Милевски.
Репрезентацијата во Австрија од клупата ќе ја предводат Роберт Стојановски и Звонко Златановски.