Тимот на „Мекларен“ денеска соопшти дека нивни втор возач следната сезона во шампионатот во Формула 1 ќе биде Џенсон Батон, додека Кевин Магнусен ќе ја врши улогата на тест возач.
„Мекларен“ од претходно постигна договор за ангажирање на Фернандо Алонсо од „Ферари“, а се чекаше одлука за негобвиот тимски колега, дилемата беше Батон или Магнусон.
– Политиката на „Мекларен“ отсекогаш била да состави најсилен тим и верувам дека тоа сега го имаме со Алонсо и Батон. Преговорите со Џенсон долго траеја, ама успешно завршија, изјави шефот на „Мекларен“ Рон Денис.
Алонсо во 2007 година возеше за „Мекларен“, но го напушти тимот поради несогласување со Луис Хамилтон.
Новата сезона во Формула 1 почнува на 15 март 2015 година со трката во Мелбурн за Големата награда на Австралија.