Најдобриот стрелец во историјата на Челзи, Френк Лампард, и следната сезона ќе го носи дресот на лондонскиот премиерлигаш, откако денеска потпиша нов едногодишен договор со сините од „Стемфорд бриџ“.
– Пресреќен сум поради продолжувањето на договорот. Иако имаше некои информации дека ќе го напуштам Челзи, навивачите знаеја дека тоа не беше моја желба. Останувам во клубот, со кој се надевам на нови успеси во следната сезона – изјави Лампард ден по освојувањето на Лигата на Европа.
За 34-годишниот играч од средниот ред на Челзи идната ќе биде 13 сезона, а досега има одиграно 607 натпревари за лондонскиот клуб.
Во 2004, 2005 и 2009 година го има добиено признанието за најдобар играч во Премиер лигата.