Напаѓачот на Барселона, Луис Суарез, ќе го напушти клубот ова лето. Според новинарот Херард Ромеро, новиот главен тренер на Каталонците, Роналд Куман, телефонски контактирал со Уругваецот и го известил дека не смета на неговите услуги, и покрај тоа што е под важечки договор.
Куман ја презеде Барса во текот на летото, заменувајќи го Кике Сетиен. Претходно, самиот Суарез изјави дека нема да ги напушти Каталонците.
Беше објавено дека за 33-годишниот Уругваец е заинтересиран неговиот поранешен клуб Ајакс, кој нуди 15 милиони евра.
Суарез ги брани боите на Барса уште од 2014 година. Минатата сезона тој постигна 21 гол и седум асистенции на 38 натпревари во сите натпреварувања.