Лидерот во светскиот шампионат во Формула 1, Луис Хамилтон, ја освои пол позицијата во пресрет на трката за Големата награда на Италија. Британецот до јубилејната 50-та пол позиција во кариерата, 11-та оваа сезона, стигна со најбрзиот круг на легендарната патека во Монца од 1:23.397 минути.
Зад Хамилтон, кој четврти пат во кариерата ќе стартува од првата позиција во Монца, трката ќе ја започнат пилотите на Ферари, Кими Раиконен и Себастијан Фетел. Вториот ред го комплетираше колегата на Хамилтон, Нико Розберг.
Меѓу првите десет пласман на стартот изборија Фелипе Маса и Валтери Ботас од Вилијамс, Серхио Перез од Форс Индија, Роман Грожан од Лотус, односно Нико Хилкенберг (Форс Индија) и Маркус Ериксен (Заубер).
Хамилтон е лидер во генералниот пласман со 227 бодови, 28 помалку има Розберг, а трет е Фетел со 160 бодови.
Трката за Големата награда на Италија во Монца, ќе се вози во недела од 14 часот.