Изминатиот викенд, на 7-ми септември 2013. година, градоначалникот на Општина Карпош, Стевчо Јакимовски, се стекна со плакета-благодарница за унапредување на спортот, со посебна заслуга за развојот на каратето во Македонија, од Карате-клубот „Аеродром“.
Овој карате-клуб, петта година по ред, организира „Вадодан-ден“, ден за дружба на вадорју карате-мајсторите и шотокан-мајсторите од Македонија, кој годинава се одржа во Сарај.
На денот за дружба, посебни благодарници за унапредувањето на спортот во Македонија добија повеќе личности заслужни за развојот на каратето, а меѓу нив Живко Аврамов, Ѓорѓи Тасевски, Владе Мирчевски, Исмет Мехмети, Бесник Мурати, Драган Стојановски, Чедомир Саздовски, Јован Јакимовски, Петар Ѓозев и Цветко Кузевски од Македонија и Димитар Тренков и Стојан Геков од Бугарија.
Посебна благодарница, со потпис од сите вадорју-мајстори присутни на манифестацијата, доби градоначалникот на Општина Карпош, Стевчо Јакимовски, како особено заслужен за промоцијата на карате-спортот во Македонија и за унапредување на спортот воопшто.