Меѓународниот одбор на фудбалски асоцијации (ФИФА) ќе разгледа укинување на суспензијата на сите руски репрезентации откако Меѓународниот олимписки комитет (МОК) вчера ги повика меѓународните спортски федерации да ја укинат суспензијата на Русија поради војната во Украина, соопшти организацијата.
– ФИФА е свесна за одлуката на МОК привремено да ја укине суспензијата на Рускиот олимписки комитет. Ќе ја анализираме одлуката пред да одлучиме за следните чекори во координација со релевантните засегнати страни, се вели во соопштението.
Руските репрезентации не учествувале на меѓународни натпревари од 2022 година, кога ФИФА и Европската фудбалска асоцијација (УЕФА) ги суспендираа руските тимови по избувнувањето на војната во Украина. Суспензијата ја спречи Русија да се квалификува за Светските првенства во 2022 и 2026 година, како и за Светското првенство за жени во 2023 година.
Претседателот на ФИФА, Џани Инфантино, во февруари изјави дека враќањето на руските тимови во меѓународните натпреварувања треба да се разгледа, велејќи дека забраната „не постигнала ништо, туку создала поголема фрустрација и омраза“.
ФИФА претходно го одобри учеството на руската репрезентација до 15 години на Светското првенство за таа возрасна група, кое ќе се одржи во Азербејџан во октомври.
УЕФА се откажа од својот план за враќање на руските младински тимови во натпреварувањата во 2023 година по противењето на неколку европски федерации.
Меѓународниот олимписки комитет (МОК) вчера објави дека привремено ја укина суспензијата на Рускиот олимписки комитет, која беше во сила од 12 октомври 2023 година, и дека препораките до меѓународните спортски федерации во врска со учеството на руските спортисти повеќе не се во сила.
Во соопштението се наведува дека МОК ја остава одлуката за организирање на натпреварувањето во Русија, поканување на руски државни функционери и користење на руското знаме, химна и други државни симболи на меѓународните спортски федерации и организаторите на натпреварите.