Меѓународната фудбалска федерација (ФИФА) ја отфрли жалбата на поранешниот холандски репрезентативец Марк Овермарс да извршува каква било функција во професионалниот фудбал во наредната година, пишува Dutch Times.
„Добивме порака во две реченици. Првата реченица вели дека жалбата е отфрлена, а втората реченица вели дека трошоците ќе ги сноси Овермарс. Сега треба да бараме објаснување преку порталот на ФИФА. Минатиот пат тоа траеше подолго“, изјави претставникот на Овермарс, Френк Нерворт.
Холандскиот спортски суд (ИСР) во ноември минатата година одлучи да му забрани на Овермарс да има било каква функција во холандскиот фудбал во период од две години, од кои едната е суспендирана.
Холандската фудбалска асоцијација (КНВБ) ја прифати одлуката на ИСР и на почетокот на јануари му забрани на Овермарс да има каква било функција во професионалниот фудбал следната година на глобално ниво, бидејќи испраќал несоодветни пораки до колешките. Суспензијата на Овермарс е на сила од 16 ноември минатата година, пренесува Танјуг.
На почетокот на годината ФИФА го прифати барањето на КНВБ и ја продолжи суспензијата на Овермарс на глобално ниво. Холанѓанецот тогаш беше на функцијата спортски директор на белгиски Антверпен, но поради суспензијата мораше да се повлече од оваа функција.
Во февруари 2022 година, Овермарс ја напушти функцијата спортски директор на Ајакс поради „неприфатливо однесување“ кон колешките. Потоа се извини за своето однесување.
Нерворт изјави дека Овермарс во следниот период ќе одлучи дали ќе поднесе жалба до Судот за спортска арбитража (CAS) во Лозана.
Во текот на својата играчка кариера, Овермарс играше за Ајакс, Арсенал и Барселона.