Со поддршка на Општина Карпош, во организација на здружението „Влајко проактивни граѓани“ – Скопје, вчеравечер, на терените на спортско рекреативниот центар во населбата Влае, се одиграа финалните натпревари од четвртиот по ред турнир во мал фудбал „Влајко-куп – 2014“.
Во возбудлив спортски меч кој изобилуваше со неизвесност до самиот крај, екипата „Бранко Ѓуровски“ славеше над своите ривали „Лока“ со резултат 3:1, со што го освои годинешниот „Влајко-куп“. Во борба за третото место, екипата „Дар Мар“ славеше над своите соперници „Маркет Кала Мац“ со резултат 4:2.
Новитет на годинешната спортска манифестација беше менувањето со самолепливи сликички за албумот од Светското фудбалско првенство во Бразил 2014. Имено, љубителите на фудбалот ја искористија оваа можност, коментираа, меѓусебно разменуваа сликички и со нетрпение ги очекуваа финалните натпревари.
За трите најдобро пласирани екипи следуваа пехари и медали, а во рамките на оваа спортска манифестација Бојан Ѓуровски од екипата „Бранко Ѓуровски“ беше прогласен за најдобар играч на турнирот. Наградата најдобар голман ја понесе Игор Ѓорѓиевски од истата екипа, додека, со постигнати 13 голови, наградата најдобар стрелец на турнирот му припадна на Мартин Дувњак од „Спорт вижн“.
„Влајко-куп“ прераснува во елитна спортска манифестација за што говори учеството на 48 тимови во мал фудбал, што досега претставува рекорден број на пријавени екипи.