Поранешниот прославен српски фудбалер Драган Стојковиќ – Пикси е назначен за нов селектор на репрезентацијата на Србија, официјално е соопштено денеска во Белград.
– Договорот е постигнат. Стојковиќ е нов селектор на Србија, потврди попладнево заменикот претседател на Фудбалската федерација на Србија (ФСС), Марко Пантелиќ.
Пантелиќ прецизираше дека преостанува да се „прецизираат уште неколку технички детали“.
– Повеќе за тоа ќе зборуваме идната недела на промоцијата и конференцијата за новинари, најави заменикот претседател на ФСС.
Стојковиќ (55) доаѓа на местото на Славиша Тумбаковиќ, кој во декември поднесе оставка како селектор на Србија.
Еден од најдобрите српски фудбалери и долгогодишен капитен на поранешната југословенска репрезентација, Пикси во кариерата со голем успех го носеше дресот на Раднички од Ниш, Црвена ѕвезда и Олимпик Марсеј, освојувајќи ја Лигата на шампиони со францускиот тим во 1993 година.
Во тренерската кариера што ја започна во 2008 година, новиот српски селектор предводеше само две азиски екипи – јапонската Нагоја и кинескиот Гвангжу.