Хрватскиот кошаркарски интернационалец Доминик Мавра е нов член на македонскиот шампион МЗТ Скопје Аеродром откако во текот на денешниот ден ги заврши формалностите околу потпишувањето на договорот. Мавра сезонава ја почна како играч на шпански Хувентуд, со кој исто така денеска ја прекина соработката.
Мавра ланската сезона играше во Македонија, но во дресот на Карпош Соколи. Воедно тој беше еден од најзаслужните за освоениот Куп на Македонија на „соколите“, а го доби и признанието МВП на ова натпреварување. Тој настапува на двете бековски позиции.
Мавра кариерата ја почна во Загреб, а играше и за екипите на Сплит, Цибона и полски Даброво. Тој беше и на поширокиот список на репрезентацијата на Хрватска за настап на Европското првенство 2017, а има играно и за помладите селекции на Хрватска, со кои има и освојувано медали.
Мавра се очекува утре да допатува во Скопје, што значи дека можност да дебитира ќе има на неделниот дуел од АБА лигата со Мега во недела.