Мечот помеѓу Тотенхем и Њукасл го отвори 26-тото коло во Премиер-лигата.
Одлична фудбалска партија понудија екипите на Тотенхем и Њукасл која заврши со триумф на домаќините од 2-1, благодарение на извонредниот Герет Бејл.
Напрво во 5-тата минута со фантастичен шут од слободен удар, фантастичниот Велшанец му донесе предност на својот тим. Но, кратко траеше радоста на домаќините бидејќи само дваесетина минути подоцна, Њукасл успеа да дојде до израмнување, со автоголот на Доусон, кој несреќно и го смени правецот на топката по упатениот удар од Гуфран и го измами Лорис.
Во вториот дел, многу поконкретна беше екипата на Тотенхем и по неколку пропуштени прилики, во 78-мата минута, повторно Герет Бејл, во за него препознатлив стил, како „брз воз“ покрај противничките дефанзивци, успеа да помине и да го совлада Тим Крул за конечни 2-1.
Со овие три бода, Тотенхем стигна до 48 на своето конто, и за момент се искачи на третата позиција, во очекување на мечот на Челси кој на домашен терен ја пречекува екипата на Виган.