Оваа сабота (21 април) во арената „Филип Втори“ во Скопје ќе се одржи вториот аматерски атлетски митинг „Скопје 2018“.
Како што велат од организаторите, овој атлетски митинг е наменет за сите оние што го сакаат трчањето, рекреативно се занимаваат со трчање и спорт, се подготвуваат за Скопскиот маратон или сакаат да ги проверат своите можности и брзина во некоја од предвидените дисциплини.
На аматерскиот митинг учесниците ќе може да се натпреваруваат во дисциплините на 100 метри, 400, штафета 4 по 400, една милја (1.600 метри), 5.000, 10.000 метри и скок во далечина. Секој заинтересиран може да се пријави за учество на митингот преку веб-страницата на „Прв до врв“.
Атлетскиот митинг ќе трае од 10 до 16 часот и е отворен за сите заинтересирани што сакаат да учествуваат. Тој е во организација на здружението за спорт и рекреација „Прв до врв“ во соработка со Атлетската федерација на Македонија.