Новиот унгарски премиер, Петер Маѓар, оцени дека би било подобро Европската Унија, пред Украина, да прифати долгорочни кандидати за ЕУ од Западен Балкан во своето членство, бидејќи во спротивно би можела да го изгуби кредибилитетот во тој регион.
– Што се однесува до приемот во членство во принцип, сакам да ги охрабрам европските земји, пред да им се вети некаков статус на другите, прво да ги примат во ЕУ оние кандидати кои се подготвувале многу години, кои се откажале од многу, презеле многу обврски и добиле многу ветувања – рече Петер Маѓар во интервју за австриската агенција АПА.
Унгарскиот премиер рече дека се плаши дека во спротивно ЕУ ќе го изгуби кредибилитетот во земјите од Западен Балкан, објавија австриските медиуми.
– Знаеме дека стабилноста и безбедноста на Балканот не се само во интерес на Балканот, туку и на Европа. Затоа сакам да ги охрабрам сите прво да го исполнат она што го ветивме претходно, пред да се дадат разни ветувања во име на Европската Унија – рече Унгарецот, кој во четврток ја оствари својата прва посета на Австрија како премиер.
Одговарајќи на прашањето дали, како што вети, во Унгарија ќе се одржи референдум за влез на Украина во ЕУ, Унгарецот рече дека ќе се одржи, но дека ова не е единствен случај.
– Многу сме далеку од тоа, бидејќи Украина нема да биде утре или задутре, но, ако воопшто се одржи, најрано за десет години, ќе биде толку далеку што ќе влезе во ЕУ. Но, не е само мислењето на Унгарија, туку на речиси сите европски влади дека нема два начина за влез во ЕУ – рече Маѓар.
Тој истакна дека секој што сака да се приклучи на ЕУ „мора да помине низ истите процедури, да ги исполни истите услови“. Според него, Унгарија навистина има намера да одржи референдум за прием на Украина, но само кога ќе заврши војната со Русија и ако Киев сè уште го сака тоа членство.
– Сепак, не сме сами во ова, бидејќи референдуми за прием на земја во ЕУ веќе се одржани во голем број земји – рече Маѓар.