Српскиот претседател, Александар Вучиќ, изјави дека за постигнување компромис со Приштина потребни се многу енергија, труд и желба, па да се жртвуваат и сопствените кариери за да се обезбеди иднината на децата. Тој, сепак, изрази сомнеж дека и косовските претставници го сакаат истото.
Говорејќи за изборот на новиот косовски тим во преговорите и можноста да продолжи дијалогот со Приштина, Вучиќ повтори дека предуслов за тоа е укинувањето на таксите.
„Нека ги укинат таксите, па нека испратат на разговори кого сакаат“, рече Вучиќ.
Гостувајќи во телевизијата „Пинк“, Вучиќ рече дека некои од надвор, а можеби и од внатре, направиле веќе да не се говори за тешката положба на косовските Срби, кои никогаш не биле во потешка ситуација, како ни за таксите што Приштина ги зголеми на 100 проценти.