Српскиот претседател Александар Вучиќ по средбата со унгарската претседателка Катлин Новак во Белград на прес-конференција изјави дека разговарале за сите важни прашања и дека Србија и е благодарна на Унгарија што и дозволила да ги користи капацитетите за складирање гас под поволни услови, јави дописникот на МИА од Белград.
-Ова за нас од технички причини ни е многу важно за зимата. Ќе биде неспоредливо полесно и малку помирно ќе ја дочекаме зимата. Без поддршката на претседателката Новак и премиерот (Виктор Орбан) не би можеле да го направиме тоа, рече Вучиќ.
Тој додаде дека тоа се работи кои не се забораваат и дека секој придонес во тешки времиња секогаш се памети.
Српскиот претседател потсети дека се работи и на инфраструктурното поврзување, со брзата пруга Белград-Будимпешта, изразувајќи уверување дека до 2025 година, и покрај се, тој проект ќе биде завршен, и секој ќе може да стигне од Белград до центарот на Будимпешта за 2 часа и 40 минути.
Вучиќ посочи дека односите меѓу Србија и Унгарија се на највисоко ниво во современата политичка историја и додаде дека трговијата толку многу напредувала што станала речиси неспоредлива со другите земји.
Тој истакна дека замаецот на сите односи меѓу Србија и Унгарија е силен и дека двете земји имаат големо разбирање една кон друга во политичка смисла, посочувајќи дека Унгарија ги разбира сите обиди на Србија да најде компромисно решение во дијалогот со Косово.