Во Брисел денеска ќе почне нова дводневна рунда од техничкиот дијалог меѓу Белград и Приштина за имплементација на спогодбата за нормализирање на односите, а главни теми ќе бидат полицијата, правосудството, електричната енергија и телекомуникациите.
Белградската делегација ја предводат советникот на претседателот на Србија, Марко Ѓуриќ и координаторот на одборот за имплементација Александар Вулин, а во состав на делегацијата ќе биде и министерот за правда Никола Селаковиќ.
На другата страна на масата ќе седнат потпретседателите на косовската Влада Едита Тахири и Хајредин Кучи со присуство на функционери и експерти за одредени области.
Европската комисија ќе ја претставува Фернандо Џентили, директор за Западен Балкан во Европската служба за надворешни работи и близок соработник на високиот претставник за надворешна политика и безбедност Кетрин Ештон.
Претходната рунда за ова прашање заврши минатата недела со мал напредок, но без договор за многу важни прашања, за што официјален Белград ја обвинува приштинската делегација и вели оти таа се обидува да наметне решенија, кои не се во рамки на спогодбата, која на 19 април ја потпишаа српскиот премиер Ивица Дачиќ и косовскиот премиер Хашим Тачи.