Во Брисел денеска ќе се одржи осмата рунда преговори меѓу премиерите на Србија и Косово, Ивица Дачиќ и Хашим Тачи, со посредство на ЕУ, на која клучното прашање треба да биде широката автономија на Северно Косово, на што Приштина се противи, јави Танјуг.
Многу сметаат дека денешниот состанок на Дачиќ со Тачи е одлучувачки, бидејќи Европската комисија во средината на април треба да го претстави извештајот за напредокот на Србија за процесот на евроинтеграција, кој ќе го опфати напредокот во нормализација на односите Белград-Приштина.
Државниот врв на Србија вчера, во пресрет на осмата рунда дијалог, постигна договор за тоа што е минимумот на српските барања и кој ќе биде во состав на делегацијата, во која освен Дачиќ, ќе биде и вицепремиерот Александар Вучиќ и потпретседателката на Владата на Србија за евроинтеграции Сузана Грубејшиќ.
– Она на што инсистираме е правосудството, полицијата и никогаш војската да не биде на територијата на заедниците на српските општини, рече вчера Николиќ и додаде дека гарант за тоа би требало да биде ЕУ.
Тачи пред заминувањето за Брисел изјави дека нема да биде лесно да се постигне договор и повтори дека заедницата на српски општини нема да може да има ниту законодавни, ниту извршни овластувања.
Според Тачи, цената за евентуално изостанување на договор ќе ја плати Белград, во вид на доцнење во процесот на евроинтеграции.