Италијанската телевизија „РАИ 3“, која во својата репортажа наведе дека во Албанија за дури дванаесет пати е зголемено производството на марихуана, го налути албанскиот премиер Еди Рама кој ова го нарече новинарски срам.
„Синоќешната вест за „РАИ 3“ дека наводно за дванаесет пати е зголемено одгледувањето канабис во Албанија е новинарски срам, без никаква врска со реалноста, рече тој.
Посакувам нашите одлични партнери сами да ја кажат вистината без да губат време”, напиша Рама на Твитер.
Lajmi i mbrëmshëm në RAI 3 mbi gjoja 12 fishimin e kultivimit te kanabisit në Shqipëri është një turp gazetaresk, pa asnjë lidhje me realitetin e monitoruar dhe çertifikuar nga vetë Guardia di Finanza! Uroj që partnerët tanë të shkëlqyer ta thonë vetë pa humbur kohë të vërtetën!
— Edi Rama (@ediramaal) January 28, 2020
Но, опозицијата не е на тоа мислење. Во изјавата за медиумите, потпретседателот на третата по големна партија во земјата, Социјалистичкото движење за интеграција, Петрит Васили и поранешниот пратеник на демократите, Ервин Слиањи, изјавија дека репортажата на „РАИ 3“ ја „демаскирала пропагандата на Рама“.
Според нив, фактите на „РАИ 3“ укажуваат на реалната состојба во која се наоѓа земјата и дека владата не успеала во борбата против дрогата и организираниот криминал, што е еден од главните критериуми на Бундестагот за започнување преговори.
Репортажата на „РАИ 3“ го потврдува неуспехот на Рама и фактот дека Албанија и понатаму е Колумбија во Балканот, изјави Слиањи.
Посочи дека Албанија не само што не се бори против организираниот криминал, туку „тој е заштитен од владејачката партија и стана главен играч во меѓународната трговија со наркотици“.