Министерот за градежништво, транспорт и инфраструктура, Горан Весиќ изјави дека до 2025 година брзата пруга Белград-Будимпешта ќе биде готова и дека ќе бидат потребни три часа за да се патува до главниот град на Унгарија.
Тој во гостувањето на телевизија Пинк истакна дека во моментов се работи и на брзата пруга Белград-Ниш.
„Кога ќе заврши оваа делница, од Белград до Ниш ќе бидат потребни 100 минути“, рече Весиќ.
Министерот посочи и дека е потпишан меморандум со Северна Македонија, со што двете земји заеднички ќе аплицираат до ЕУ за средства за изградба на дел од брзата пруга Ниш – Скопје.
„Кога ќе биде готово, ќе биде тричасовно патување од Скопје до Белград. Тоа драматично ќе ги промени животите на граѓаните“, рече Весиќ.