Во гумениот брод што утрово се насука на карпестиот брег на грчкиот остров Лезбос, во близина на градот Агиос Георгиос Термис, загинаа двајца мигранти, а двајца се водат за исчезнати.
Според грчкиот национален сервис ЕРТ, од 36 патници, пет од нив паднале во вода, а двајца од нив, жена со африканско потекло и маж, биле пронајдени мртви. Двајца се водат за исчезнати, а еден маж е пренесен во болница, каде подоцна бил отпуштен.
Крајбрежната стража побарала помош од приватен нуркач за да ја пребара областа за двете исчезнати лица, но поради силните ветрови тоа не беше можно.
Триесет и двајца бегалци и мигранти кои беа пронајдени во околината и спасени се пренесени во Прифатниот и идентификационен центар (КИТ) Кара Тепе, каде што постапката за нивна регистрација ќе продолжи утре.