Речиси 2000 научници од сите институти и факултети во Србија се собраа да го кренат гласот против одлуката на Министерството за образование и наука за неспроведување на Стратегијата за научен и технолошки развој, како и укинување на фондот за истражувањата од областа на науката.
Демонстрантите бараат оставка на сите функционери во министерството, на чело со министерот Жарко Обрадовиќ, поради нестручност, нерешавање и игнорирање на проблемите во оваа област.
Српскиот Синдикат за наука условува да се зголеми нивото на материјалните трошкови за истражувачите за 50 насто, како и нивна навремена исплата, но и донесување закон за финансирање на науката до крајот на 2013-та година, според европски модел.
Синдикатот се надева на итна средба со премиерот Ивица Дачиќ, за да се усвојат и спроведат неопходните мерки за спас на науката.